როგორ შევისწავლოთ გენერაციული AI: პრაქტიკული გზამკვლევი დამწყებთათვის საქართველოში

გენერაციული ხელოვნური ინტელექტი ერთ-ერთი ყველაზე დინამიკური და გავლენიანი ტექნოლოგიაა თანამედროვე ციფრულ სამყაროში. მისი ათვისება არა მხოლოდ პროგრამისტებისთვისაა საინტერესო – ნებისმიერი ადამიანი, ვისაც სურს ტექსტების გენერაცია, გამოსახულებების შექმნა ან ბიზნესპროცესების ავტომატიზაცია, შეიძლება სწავლა დაიწყოს. მაგრამ როგორ? როგორ შევისწავლოთ GenAI მარტივად და ეფექტურად?

ერთ-ერთი საუკეთესო მეთოდი ხელოვნური ინტელექტის შესასწავლად არის მისი უშუალოდ გამოყენება. OpenAI-ის ChatGPT, Google Gemini, Meta-ის Llama თუ სხვა GenAI მოდელები მარტივი გამოსაყენებელია და არ მოითხოვს ტექნიკურ ცოდნას. დაიწყეთ ექსპერიმენტებით: დასვით შეკითხვები, შექმენით ტექსტები, ითამაშეთ პარამეტრებით და ნახეთ, როგორ რეაგირებს AI სხვადასხვა მოთხოვნებზე. ამასთანავე, “პრომტინგის” სწორად გამოყენება სასიცოცხლოდ მნიშვნელოვანია. გენერაციული მოდელების შედეგი დიდწილად დამოკიდებულია იმაზე, რამდენად კარგად და დეტალურად არის ფორმულირებული მოთხოვნა. ზოგადი ან ბუნდოვანი “პრომტები” სუსტ შედეგს გამოიღებს, ხოლო მკაფიოდ ჩამოყალიბებული და კონტექსტით დატვირთული მოთხოვნები უფრო ზუსტ და სასარგებლო პასუხებს მოგცემთ.

თუ უფრო სიღრმისეულად გსურთ შესწავლა, კარგი იქნება, თუ გაიგებთ, როგორ მუშაობს გენერაციული AI. საბაზისო ცნებები, როგორებიცაა ნერვული ქსელები, ტრანსფორმერული მოდელები და დიდი ენობრივი მოდელები (LLM), დაგეხმარებათ უკეთ გააცნობიეროთ მისი შესაძლებლობები და შეზღუდვები. ამისთვის შეგიძლიათ გამოიყენოთ ონლაინ კურსები, რომლებიც განკუთვნილია როგორც დამწყებთათვის, ისე მათთვის, ვინც სიღრმისეულად დაინტერესებულია ტექნოლოგიის ფუნქციონირებით. Coursera-ზე „AI for Everyone“, DeepLearning.AI-ის “Prompt Engineering for AI” და Fast.ai-ის “Practical Deep Learning for Coders” კარგი საწყისია.

გარდა ამისა, GenAI მუდმივად ვითარდება და ახალი მოდელების გამოსვლა ყოველდღიურ მოვლენად იქცა. სასარგებლოა ისეთი ფორუმებისა და ჯგუფების წევრობა, როგორიცაა Reddit-ის r/ArtificialIntelligence, Discord-ის AI თემატური სერვერები, Hugging Face-ის კომუნა და X (ყოფილი Twitter), სადაც უამრავი ექსპერტის გამოცდილებას გაეცნობით.

ბევრ ადამიანს ავიწყდება, რომ AI-ს შეუძლია შეცდომების დაშვება და დეზინფორმაციის გავრცელება. ყოველთვის გადაამოწმეთ მიღებული შედეგები და კრიტიკული აზროვნება არ დაკარგოთ, განსაკუთრებით მაშინ, როცა სანდო წყაროებზე დაყრდნობა მნიშვნელოვანია.

საქართველოში გენერაციული AI-ს გამოყენებისას უმჯობესია “პრომპტები” ინგლისურად დაწეროთ, მაგრამ AI-ს ქართულ ენაზე პასუხი სთხოვოთ. ეს ხელს უწყობს უფრო ზუსტ და კონტექსტურად სწორ გენერაციას. თუმცა, უმეტეს შემთხვევაში, ჯობია AI-მ ტექსტი პირდაპირ ქართულად შექმნას და არ გამოიყენოს თარგმანი, რადგან ავტომატურმა თარგმანმა შეიძლება მეტი შეცდომა შეიტანოს, განსაკუთრებით რთულ ან სპეციალიზებულ ტექსტებში.

BTU-ს 2024 წლის ოქტომბრის კვლევის მიხედვით, საქართველოში გენერაციული AI-ის მომხმარებელთა 82% დამოუკიდებლად, ონლაინ რესურსების მეშვეობით სწავლობდა. პრაქტიკული გამოცდილება და AI-ის გამოყენება სამუშაო პროცესში 55%-ისთვის იყო ძირითადი სწავლის მეთოდი, მაშინ როცა მხოლოდ 15% იღებდა რჩევებს მეგობრებისა და კოლეგებისგან. ტრენინგები და სხვა საგანმანათლებლო აქტივობები გაცილებით ნაკლებად პოპულარული იყო, რაც აჩვენებს, რომ GenAI-ის შესწავლა საქართველოში ძირითადად თვითსწავლასა და პრაქტიკულ გამოყენებაზეა დაფუძნებული.

BTU-ის 2024 წლის ოქტომბრის კვლევის სრული ანგარიში შეგიძლიათ იხილოთ ბმულზე.