კრიპტოვალუტის საფრთხეები: როგორ შეიძლება ერთ წამში დაკარგოთ ყველაფერი

ციფრული აქტივების სამყაროში, სადაც ყოველდღიურად იზრდება კრიპტოვალუტების პოპულარობა, რისკებიც თანდათან მატულობს. მილიონობით ადამიანი ცდილობს მონაწილეობა მიიღოს ამ ბაზარზე, თუმცა ხშირად ვერ აცნობიერებენ, რამდენად დიდ საფრთხეებს შეიცავს არასწორი ქმედებები, დაუდევრობა ან სულ მცირე შეცდომებიც კი. თაღლითები კი სულ უფრო დახვეწილ ხერხებს იყენებენ, მათ შორის, ხელოვნური ინტელექტის დახმარებით შექმნილ უნიკალურ, პერსონალიზებულ ხაფანგებს, რის გამოც უფრო და უფრო მეტი ადამიანი ხდება მათი მსხვერპლი.

ამიტომაც, კრიპტო–ბაზარზე მომუშავე ყველა ინვესტორმა უნდა იცოდეს, რომ ერთი დაუდევარი ნაბიჯიც კი შეიძლება მთელი მათი კაპიტალის დაკარგვის მიზეზად იქცეს. არსებობს რამდენიმე მთავარი საფრთხე, რომელთა თავიდან აცილება მნიშვნელოვანია.

პირველი საფრთხე თავად კრიპტო–გაცვლითი პლატფორმებია. დღეს ბაზარზე ასობით კრიპტო–ბირჟა ფუნქციონირებს, თუმცა მათი ნაწილი არასტაბილურია და ხშირად ფალსიფიცირებული ან თაღლითურია. არსებობს შემთხვევები, როდესაც ეს პლატფორმები გაკოტრდნენ, ხოლო ინვესტორების აქტივები უბრალოდ გაქრა. ექსპერტების რეკომენდაციაა, რომ კრიპტო–სავაჭრო პლატფორმა აუცილებლად იყოს რეგისტრირებული და სერტიფიცირებული, მაგალითად, ნიუ–იორკის ფინანსური სერვისების დეპარტამენტის მიერ, სადაც პლატფორმები მკაცრ შემოწმებას გადიან. ასეთი პლატფორმები უფრო უსაფრთხოა, თუმცა გარანტირებული დაცვა მაინც არ არსებობს.

კიდევ ერთი დიდი რისკია უსაფრთხო შესანახი სივრცის უგულებელყოფა. კრიპტო–საფულეების გახსნას სპეციალური „პირადი გასაღებები“ სჭირდება, რომლებიც რთული კოდებია. ბევრი ინვესტორი მათ ონლაინ სივრცეში ინახავს, რაც ძალიან სარისკოა, რადგან ჰაკერებისთვის ნებისმიერ ონლაინ–მონაცემზე წვდომა შესაძლებელი ხდება. ამიტომ ექსპერტები ურჩევენ, რომ კრიპტო–აქტივები „ცივ“, ანუ ინტერნეტისგან იზოლირებულ აპარატურაზე („cold wallet“) შეინახონ. ეს ხელსაწყოები USB ფლეშკის ზომისაა და გაცილებით დაცულია კიბერთავდასხმებისგან.

თუმცა, „ცივი საფულეც“ კი უსაფრთხოებას ვერ უზრუნველყოფს, თუ მისი „seed-ფრაზა“ (ფრაზა, რომელიც წვდომას ყველა გასაღებზე უზრუნველყოფს) არ იქნება დაცულად შენახული. ადამიანებს seed-ფრაზები ხშირად ქაღალდზე აქვთ დაწერილი და დაკარგვის ან დაზიანების შედეგად, მათი აღდგენა შეუძლებელია. იმ შემთხვევაში, თუ ეს ფრაზა სხვა პიროვნების ხელში აღმოჩნდება, მათ შეუძლიათ უპრობლემოდ მოიპარონ მთელი კრიპტო–აქტივები. ამიტომ რეკომენდებულია, რომ seed-ფრაზა არა მხოლოდ სახლში, არამედ ბანკის საცავში ან ოჯახის სანდო წევრთანაც შეინახოთ, პარალელურად კი ციფრული უსაფრთხოების სპეციალურ მოწყობილობაზეც მოახდინოთ მისი დაცვა.

მეოთხე საფრთხე scammers—კრიპტო–თაღლითები არიან, რომლებიც აქტიურად ცდილობენ თქვენი seed-ფრაზის მოპარვას. ისინი ხშირად იყენებენ ტექნიკური მხარდაჭერის საფარქვეშ სატელეფონო ზარებს, ტექსტურ შეტყობინებებსა და ელექტრონულ ფოსტას, რათა ადამიანები შეცდომაში შეიყვანონ და გადააცემინონ მათ ფრაზა. ექსპერტების ერთსულოვანი პოზიციაა: seed-ფრაზა არასოდეს არავისთან, არანაირ პირობებში არ უნდა გაზიაროთ.

ხშირად ხდება, რომ კრიპტო–ინვესტორები ხვდებიან უფრო სტანდარტული სოციალურ ინჟინერიის ხაფანგში. ისინი იღებენ ელ.ფოსტასა ან ტექსტურ შეტყობინებებს, სადაც თითქოსდა ჯილდოს მიღება შეუძლიათ, მაგრამ რეალურად ეს არის თაღლითური სქემა. ერთი დაუფიქრებელი დაჭერა, ერთი პატარა ბმულის გახსნა შეიძლება საკმარისი იყოს, რათა ჰაკერებმა მყისიერად გამოაცარიელონ თქვენი კრიპტო–საფულე. ამიტომაც მნიშვნელოვანია, არ გახსნათ არასანდო ბმულები და არანაირი მოქმედება არ განახორციელოთ უცნობი ელ.ფოსტიდან.

ბოლოს, მნიშვნელოვანი რისკია, რომელიც თავად ტრანზაქციების განხორციელების პროცესში იჩენს თავს. მაგალითად, თუ კრიპტოვალუტას აგზავნით ისეთ პლატფორმაზე, რომელიც ამ კონკრეტულ ვალუტას არ აღიარებს, თქვენ შეიძლება სამუდამოდ დაკარგოთ თქვენი აქტივი. მსგავსი შემთხვევებია მაშინაც, როდესაც კრიპტოს აგზავნით არასწორ მისამართზე. უმცირესი შეცდომაც კი, ერთი არასწორი სიმბოლოს ჩაწერაც კი საკმარისია იმისთვის, რომ თქვენი აქტივი სამუდამოდ დაიკარგოს.

კრიპტო–ბაზარზე უსაფრთხოების მთავარი ფორმულა მუდმივი ყურადღება და სიფრთხილეა. დაუდევრობა აქ ძვირი სიამოვნებაა და ნებისმიერი შეცდომა შეიძლება თქვენი ფინანსური მომავლისთვის საბედისწერო აღმოჩნდეს. ამიტომ, მაქსიმალური ყურადღებითა და დეტალური შემოწმებით უნდა იმოქმედოთ ყოველთვის, როდესაც საქმე კრიპტოვალუტას ეხება

მომზადებულია – WSJ.com მასალების მიხედვით