ამერიკული აქციების გლობალური მიმზიდველობა სუსტდება – ინვესტორები ახალ შესაძლებლობებს ეძებენ

ბოლო წლების განმავლობაში ამერიკული აქციები ინვესტორებისათვის უპირობო ფავორიტი იყო. თუმცა, ბოლო პერიოდში ამ ტენდენციის მკვეთრი ცვლილება შეინიშნება: გლობალური ინვესტორები სულ უფრო ხშირად ცდილობენ თავიანთი კაპიტალის დაბანდებას არა ამერიკაში, არამედ ევროპულ და აზიურ ბაზრებზე. მიზეზები მრავალფეროვანია და მნიშვნელოვანი, დაწყებული აშშ–ს სავაჭრო ომებიდან, დამთავრებული ვაშინგტონის არაპროგნოზირებადი პოლიტიკური ცვლილებებით.

გასული პერიოდის ერთ–ერთი საინტერესო მაგალითია კიტ მოფატი – ინვესტორი კანადიდან, რომელიც ნიდერლანდებში ცხოვრობს და ირლანდიური პასპორტი აქვს. მიუხედავად იმისა, რომ მისი პორტფელის 90% ადრე აშშ–ის აქციებს უკავია, დღეს ის მთლიანად გაეცალა ამერიკულ ბაზარს და თავის კაპიტალს ევროპულ ETF-ებსა და თავდაცვის სექტორში დებს. მიზეზად მოფატი ბაზრის გაბერილ ფასებს ასახელებს, თუმცა განსაკუთრებულად შემაშფოთებელია მისთვის აშშ–ის პრეზიდენტის რიტორიკა, სადაც კანადა ხუმრობით „ამერიკის 51-ე შტატად“ მოიხსენია. „ეს იყო ბოლო წვეთი – ევროპელ ინვესტორებს აშკარად აღიზიანებთ ის, რაც ამერიკაში ხდება,“ – აცხადებს ის.

ამერიკული აქციების მიმართ განწყობის ცვლილება თვალსაჩინოა სტატისტიკაშიც: 2025 წლის პირველ ორ თვეში ინვესტორებმა ევროპულ აქციებზე დაფუძნებულ ETF-ებში 2 მილიარდი დოლარით მეტი თანხა ჩადეს, ვიდრე გამოიტანეს. შედარებისთვის, 2024 წლის მეორე ნახევარში, ამავე ETF-ებიდან ინვესტორებმა $8.5 მილიარდი გაიტანეს. ამავე პერიოდში კი S&P 500 ინდექსი 3.6%-ით შემცირდა, მაშინ როცა ევროპული Stoxx 600 8.3%-ით გაიზარდა.

ევროპული აქციების მიმართ ინტერესი განსაკუთრებით გააძლიერა გერმანიის გადაწყვეტილებამ, რომლის მიხედვითაც ქვეყნის ეკონომიკაში ტრილიონ ევრომდე თანხა ჩაიდება, დიდი ნაწილი კი თავდაცვის სექტორს მოხმარდება. შედეგად, გერმანული DAX ინდექსი წელს თითქმის 15%-ით გაიზარდა. ევროპული თავდაცვის კომპანიების აქციების ფასები მკვეთრად იზრდება, რაც კიდევ უფრო მეტ ინვესტორს იზიდავს.

ლია ჰოლმგრენი, სლოვაკი ინვესტორი მაიამიდან, რომელიც დამწყებ ინვესტორებს სოციალურ ქსელებში კონსულტაციებს უწევს, აცხადებს, რომ „ევროპული ბაზრები წლების განმავლობაში პრაქტიკულად ეძინათ“, მაგრამ ახლა აშკარად გააქტიურდნენ. მისი აზრით, ევროპის აქტიურობას ხელი შეუწყო ტრამპის იზოლაციურმა პოლიტიკამაც, რომელიც ევროპის კომპანიებს აიძულებს, უფრო აგრესიულად მოიქცნენ საერთაშორისო ბაზრებზე. თავად ჰოლმგრენმა თებერვლიდან თავისი აქტივები ამერიკული აქციებიდან ევროპულ თავდაცვის კომპანიებში გადაიტანა.

თუმცა, მიუხედავად ყველაფრისა, ამერიკული ბაზრის ერთგული ინვესტორები კვლავ დიდ იმედებს ამყარებენ აშშ–ზე. ისინი აცხადებენ, რომ გრძელვადიან პერსპექტივაში ამერიკული კომპანიები კვლავ დომინირებენ, განსაკუთრებით ხელოვნური ინტელექტის სექტორში. თუმცა, მაინც არსებობს პრობლემები, როგორიცაა მაღალი ინფლაცია, მომხმარებელთა ნდობის მკვეთრი ვარდნა და ხარჯვის შემცირება, რაც ბევრს ამერიკის ბაზრის რისკების გადაფასებისკენ უბიძგებს.

ევროპული და აზიური ბაზრების მიმართ ინტერესს დამატებით აძლიერებს ის ფაქტიც, რომ მათი ფასები ამერიკულ ბაზართან შედარებით საგრძნობლად დაბალია. მაგალითისთვის, ევროპული Stoxx 600-ის ფასი/მოგების კოეფიციენტი დაახლოებით 18.7-ია, ხოლო S&P 500-ის 24.6-ს უტოლდება. კიდევ უფრო მიმზიდველია ჩინური Hang Seng, რომლის კოეფიციენტი 13-ზე დაბალია.

საინტერესოა, რომ ზოგიერთ ინვესტორს აშშ–დან გასვლისთვის დამატებითი მიზეზიც აქვს – პოლიტიკა. პიტერ სტერნი, გერმანიაში მცხოვრები ამერიკელი ინვესტორი, ადრე აქტივების 70%-ს აშშ–ში ინახავდა, მაგრამ ახლა მიიჩნევს, რომ ამერიკასა და ევროპას შორის ურთიერთობების გაუარესება შესაძლოა სერიოზული ფინანსური რისკების შემცველი იყოს. ის თავის კაპიტალს უკვე აქტიურად გადამისამართებს ევროპულ აქციებსა და ობლიგაციებში.

მიუხედავად იმისა, რომ ზოგიერთი ინვესტორისთვის საერთაშორისო ბაზრების შესწავლა ზედმეტი გამოწვევაა, უმეტესობა მიიჩნევს, რომ ბაზრის მიმდინარე პირობებში ამერიკაზე დამოკიდებულება დიდ რისკებთანაა დაკავშირებული. თუმცა, როგორც ავსტრალიელი ინვესტორი ენდრიუ ბარნეტი აღნიშნავს, მიუხედავად არსებული პრობლემებისა, აშშ–ს გრძელვადიანი ლიდერობის პოტენციალი მაინც დიდია და ამერიკული აქციების საბოლოო ჩამოწერა ნაადრევია. „აშშ–ში ყოველთვის მსოფლიოში საუკეთესო კომპანიები იქნება, თუმცა კონკრეტულ პერიოდში, როგორიცაა ახლა, განსაკუთრებული შესაძლებლობები მაინც ევროპასა და აზიაში ჩნდება“, – ამბობს ბარნეტ

მომზადებულია – WSJ.com მასალების მიხედვით