ტრამპის პირველი ტექნოლოგიური დღის წესრიგი – $500 მილიარდიანი AI პროექტი

აშშ-ის პრეზიდენტი დონალდ ტრამპი აქტიურად განაგრძობს თავისი ადმინისტრაციის ტექნოლოგიური პოლიტიკის განსაზღვრას, რაც განსაკუთრებით ეხება ხელოვნური ინტელექტის (AI) განვითარებასა და ინფრასტრუქტურის გაფართოებას. 21 იანვარს, თეთრ სახლში გამართულ შეხვედრაზე, ტრამპმა წამყვან ტექნოლოგიურ ლიდერებთან ერთად წარადგინა ახალი, კერძო სექტორის მიერ დაფინანსებული $500 მილიარდიანი პროექტი, სახელწოდებით “Stargate”. ამ ინიციატივის მიზანია 20 ახალი მონაცემთა ცენტრის მშენებლობა, რაც აუცილებელია AI ტექნოლოგიების განვითარების მხარდასაჭერად.

ეს ინციატივა მნივნელოვნად გაზრდის მოთხოვნას ამ სფეროში დასაქმებულ კადრებზე და კიდევ უფრო შეუწყობს ხელს ხელოვნური ინტელექტის ყველა სფეროში გამოყენებას.

ხელოვნური ინტელექტის პროგრამებისთვის, როგორიცაა ChatGPT, მონაცემთა ცენტრები აუცილებელია. ეს სივრცეები, რომლებიც აღჭურვილია მაღალტექნოლოგიური და ენერგომოხმარების მაღალი სიმძლავრის ჩიპებით, ქმნის AI სისტემების ფუნქციონირების ბაზას. Stargate პროექტი, რომელშიც ჩართული არიან ისეთი კომპანიები, როგორიცაა OpenAI, SoftBank და Oracle, მიზნად ისახავს ამ ინფრასტრუქტურის მნიშვნელოვნად გაფართოებას. პროექტის დაფინანსება უზრუნველყოფილია კერძო ინვესტიციებით.

OpenAI-ის ხელმძღვანელმა, სემ ალტმანმა, ეს პროექტი “ამ ეპოქის ყველაზე მნიშვნელოვან ინიციატივად” დაასახელა, ხოლო SoftBank-ის აღმასრულებელმა დირექტორმა მასაიოში სონმა ხაზი გაუსვა, რომ პროექტი ტრამპის ხელახლა არჩევის შემდეგ გახდა შესაძლებელი.

ტრამპის ადმინისტრაციამ, ინაუგურაციის პირველივე დღეს, გააუქმა 2023 წელს ჯო ბაიდენის მიერ მიღებული რეგულაციები, რომლებიც AI ტექნოლოგიების უსაფრთხოებისა და ეთიკურობის მონიტორინგს ემსახურებოდა. ბაიდენის რეგულაციები მიზნად ისახავდა ისეთი რისკების თავიდან აცილებას, როგორიცაა ალგორითმების მიკერძოება ან AI-ის ტერორისტებისთვის გამოყენება.

ტრამპის მიდგომა განსხვავებულია,  მისი დღის წესრიგი კონცენტრირებულია ტექნოლოგიური ინდუსტრიის თავისუფლებაზე და განვითარების დაჩქარებაზე. თუმცა, კრიტიკოსები, მათ შორის ტექნოლოგიების მკვლევრები, ფიქრობენ, რომ ეს მიდგომა „ველური დასავლეთის“ პერიოდს შექმნის, სადაც AI პროდუქტების უსაფრთხოება უკანა პლანზე გადაინაცვლებს.

მონაცემთა ცენტრების მშენებლობის ბუმი ელექტროენერგიის მოხმარებაზე სერიოზულ გავლენას ახდენს. მიუხედავად იმისა, რომ AI ინფრასტრუქტურის გაფართოება ტექნოლოგიურ წინსვლას შეუწყობს ხელს, ის ასევე ზრდის ენერგიის წარმოების საჭიროებას.

ტრამპის ტექნოლოგიური დღის წესრიგი ასახავს მისი ადმინისტრაციის ბიზნესზე ორიენტირებულ ხედვას, რომელიც არეგულირებს AI-ის განვითარებას ბაზრის მოთხოვნების საფუძველზე და ინოვაციებზე აქცენტირებით.

Stargate-ის მსგავსი ინიციატივები გვიჩვენებს, რომ ტექნოლოგიური გიგანტები მზად არიან ინვესტიციების მნიშვნელოვანი მოცულობით მხარი დაუჭირონ AI-ის მომავალს. ეს პროექტები არამარტო ამერიკის, არამედ გლობალური ტექნოლოგიური ლანდშაფტის ცვლილებებს შეუწყობს ხელს, რაც ზრდის როგორც ინოვაციის შესაძლებლობებს, ასევე რეგულირების საჭიროებას.