როგორ დავზოგოთ მცირე თანხებით საქართველოში – საუკეთესო ვარიანტები

ხშირად გვგონია, რომ ფულის დაზოგვა მხოლოდ იმ ადამიანებისთვისაა, ვინც დიდი შემოსავალი აქვს, მაგრამ მცირე დანაზოგიც შეიძლება სწორად მივმართოთ და დროთა განმავლობაში მნიშვნელოვანი თანხა დაგროვდეს. საქართველოში ამ საკითხზე ბევრი განსხვავებული აზრი არსებობს, ამიტომ შევხედოთ სხვადასხვა ვარიანტს – ტრადიციულიდან ინოვაციურამდე.

ოქრო – საუკუნეების გამოცდილება: საქართველოში ოქრო ერთ–ერთ ყველაზე პოპულარულ გზად რჩება მცირე დანაზოგისთვის. მისი ღირებულება გრძელვადიან პერსპექტივაში, როგორც წესი, იზრდება. მაგალითად, 2004 წელს ერთი უნცია ოქრო დაახლოებით 400 დოლარი ღირდა, დღეს კი 2500 დოლარზე მეტია. ეს ნიშნავს, რომ ბოლო 20 წლის განმავლობაში მისი ფასი ექვსჯერ გაიზარდა. თუმცა, მოკლევადიან პერსპექტივაში ოქროს ფასის ვარდნაც შესაძლებელია, ხოლო მისი შენახვა და გაყიდვა გარკვეულ ტექნიკურ სირთულეებთანაცაა ხანდახან დაკავშირებული.

ანაბარი ბანკში – სტაბილურობა და სარგებელი: საქართველოში მოქმედი კომერციული ბანკები საკმაოდ მიმზიდველ საპროცენტო განაკვეთებს სთავაზობენ დეპოზიტებზე. ეს ვარიანტი კარგი არჩევანია მათთვის, ვისაც სურს უსაფრთხო და სტაბილური გზა მცირე თანხების გასაზრდელად. თუმცა, საპროცენტო განაკვეთები ინფლაციის ტემპს ყოველთვის ვერ უსწრებს, ამიტომ ხანგრძლივვადიან პერსპექტივაში მოგება შედარებით მცირეა.

ნაღდი ფული – ხელმისაწვდომი, მაგრამ არასტაბილური: ბევრი ადამიანი ურჩევნია ფულის ნაღდი სახით შენახვას, რადგან ის სწრაფად ხელმისაწვდომია და არ არის დამოკიდებული საბანკო სისტემაზე. თუმცა, საქართველოში ბოლო წლებში ინფლაცია მაღალია, რაც იმას ნიშნავს, რომ ნაღდი ფულის ღირებულება დროთა განმავლობაში მცირდება. ამასთან, უსაფრთხოების თვალსაზრისით, სახლის პირობებში მისი შენახვა ყოველთვის არ არის რეკომენდებული.

კრიპტოვალუტა – მაღალი რისკი, დიდი პოტენციალი: ბოლო წლებში საქართველოში კრიპტოვალუტების მიმართ ინტერესი გაიზარდა. ბიტკოინს ხშირად „ციფრულ ოქროდ“ მოიხსენიებენ, რადგან გრძელვადიან პერსპექტივაში მისი ფასიც მუდმივად იზრდება. მაგალითად, 2013 წელს ბიტკოინის ფასი 100 დოლარზე ნაკლები იყო, 2024 წელს კი 100 ათას დოლარს მიაღწია. მიუხედავად მოკლევადიანი რყევებისა, მისი შეზღუდული მიწოდება (21 მილიონი ბიტკოინი) ნიშნავს, რომ ინფლაციისგან დაცული აქტივია და გრძელვადიან პერიოდში ფიატურ ვალუტებზე (როგორიცაა აშშ დოლარი ან ლარი) უკეთ ინარჩუნებს ღირებულებას. 

ფონდის აქციები და ობლიგაციები – ინვესტირება ეკონომიკაში: საქართველოში საფონდო ბაზარი ჯერ კიდევ განვითარებადია, მაგრამ ქართველ ინვესტორებს შეუძლიათ საერთაშორისო ბირჟებზე მცირე თანხებით შესვლა. მაგალითად, მინიმალური თანხებით შესაძლებელია ისეთი დიდი კომპანიების აქციების შეძენა, როგორებიცაა Apple, Microsoft ან Coca-Cola. აქციებზე ფულის შოვნა ორი გზით არის შესაძლებელი: თუ მათი ფასი გაიზრდება, გაყიდვისას მოგებას მიიღებთ, ხოლო თუ კომპანიამ დივიდენდები გამოაცხადა, პერიოდულად დამატებით შემოსავალს მიიღებთ. დიდი, სტაბილური კომპანიების (მაგალითად, S&P 500-ის წამყვანი კომპანიები) აქციებზე რისკი შედარებით დაბალია, რადგან მათ დიდი ფინანსური რესურსი და გამოცდილება აქვთ. მაგალითად, Warren Buffett-ის Berkshire Hathaway ბოლო 30 წლის განმავლობაში საშუალოდ 10%-ზე მეტ წლიურ ზრდას აჩვენებს.

დანაზოგის საუკეთესო ვარიანტი დამოკიდებულია თქვენს მიზნებზე და რისკებისადმი დამოკიდებულებაზე – თუ სტაბილურობა გსურთ, ბანკის დეპოზიტი ან ოქრო კარგი არჩევანია, ხოლო თუ მზად ხართ გრძელვადიანი ინვესტიციებისთვის, აქციები და კრიპტო შეიძლება მომგებიანი იყოს. ყველაზე ჭკვიანური გზა კი სხვადასხვა ინსტრუმენტების კომბინაციაა, რომ რისკები დაბალანსდეს.