მეწარმეობასთან დააკავშირებული მითები, რომლებიც ბევრს აფერხებს საქართველოში

საქართველოში ბევრს აქვს საკუთარი ბიზნესის დაწყების სურვილი, მაგრამ მცდარი წარმოდგენები მათ ან პირველ ნაბიჯს არ ადგმევინებს ან სერიოზულ შეცდომებამდე მიჰყავს. მეწარმეობა ხშირად წარმოუდგენიათ როგორც ან ძალიან მარტივი გზა სწრაფი წარმატებისთვის, ან უკიდურესად რთული და მიუღწეველი საქმე. სინამდვილეში, მეწარმეობა არც ერთია და არც მეორე – მთავარია სწორი მიდგომა და რეალობის სწორად აღქმა.

„ბიზნესის დასაწყებად დიდი ფული გჭირდება“ – საქართველოში ბევრი ფიქრობს, რომ წარმატებული ბიზნესის დასაწყებად აუცილებელია დიდი საწყისი კაპიტალი, თუმცა ეს ყოველთვის ასე არ არის. დღეს უკვე არსებობს სხვადასხვა დაფინანსების შესაძლებლობები, მათ შორის გრანტები, დაბალპროცენტიანი სესხები და პროგრამები, რომლებიც ახალბედა მეწარმეებს ინვესტიციების მოზიდვაში ეხმარება. ბიზნესის დაწყება შესაძლებელია მინიმალური რესურსებით, თუ სწორად შეირჩევა ნიშა, გამოყენებულია ციფრული პლატფორმები და კარგად დაგეგმილია ეტაპობრივი ზრდა.

„მხოლოდ უნიკალური იდეები წარმატებას აღწევენ“ – რეალობა ისაა, რომ იდეა მხოლოდ დასაწყისია. გაცილებით მნიშვნელოვანია, როგორ ხორციელდება ეს იდეა, რამდენად ადაპტირდება ბაზრის მოთხოვნებზე და რამდენად ეფექტურად მართავს მეწარმე თავის რესურსებს. ბევრ წარმატებულ კომპანიას არ ჰქონია რევოლუციური იდეა – მათ უბრალოდ უკვე არსებულ პროდუქტსა და მომსახურებას უკეთესი ფორმა მისცეს.

„წარმატებული მეწარმეები დიდ რისკებს იღებენ“ – ხშირად ჰგონიათ, რომ ბიზნესის დასაწყებად აუცილებლად უნდა გარისკო ყველაფერი. სინამდვილეში, გამოცდილი მეწარმეები არ იღებენ დაუფიქრებელ რისკებს – ისინი ცდილობენ, რაც შეიძლება მეტი ინფორმაცია მოიპოვონ, შეაფასონ ყველა შესაძლო სცენარი და მხოლოდ ამის შემდეგ გადადგან ნაბიჯი. დღეს საქართველოში მეწარმეებს აქვთ წვდომა ტრენინგებზე და კონსულტაციებზე, რომლებიც ეხმარებათ რისკების შეფასებასა და სწორ ბიზნესგეგმაზე მუშაობაში. რისკი მეწარმეობის ნაწილია, მაგრამ ჭკვიანურად გათვლილი რისკი წარმატების მთავარი გასაღებია.

„თუ ბიზნესი სწრაფად არ ხდება მომგებიანი, ესე იგი, ის წარუმატებელია“ – საქართველოში ხშირად აქვთ მოლოდინი, რომ ბიზნესი პირველივე თვეებში უნდა იყოს მომგებიანი, ხოლო თუ ასე არ მოხდა, ესე იგი, იდეა არ გამართლდა. სინამდვილეში, წარმატებული ბიზნესების უმრავლესობას სჭირდება დრო, სანამ ისინი მომგებიან მოდელად გადაიქცევიან. სწორედ ამიტომ, არსებობს მხარდაჭერის პროგრამები, რომლებიც მეწარმეებს პირველ ეტაპზე ფინანსურ რესურსებზე წვდომას და ცოდნის გაღრმავებას სთავაზობს. მთავარია გრძელვადიანი ხედვა და მორგება იმ გამოწვევებზე, რაც განვითარების პროცესში ჩნდება.

„ყველაფერი უნდა თავად აკეთო“ – ბევრ დამწყებ მეწარმეს ჰგონია, რომ ბიზნესის წარმატება მხოლოდ მათ შრომაზეა დამოკიდებული და ყველაფრის თავად კეთება უკეთეს შედეგს მოიტანს. თუმცა, რეალობაში, ყველაზე წარმატებული კომპანიები სწორად შერჩეული გუნდისა და დელეგირების პრინციპზეა აგებული. დღეს საქართველოში ბევრი პლატფორმა და მენტორული პროგრამა არსებობს, რომელიც დამწყებ მეწარმეებს ეხმარება გუნდური მუშაობის უნარების გაუმჯობესებაში და კავშირების დამყარებაში. დროისა და რესურსების ოპტიმიზაცია ბიზნესის მასშტაბირების მთავარი გზაა.

საქართველოში მეწარმეობა დღეს უფრო ხელმისაწვდომია, ვიდრე ოდესმე, მაგრამ წარმატების მთავარი გასაღები არა მხოლოდ იდეაში ან ინვესტიციაშია, არამედ სწორ მიდგომაში, ანალიზსა და გრძელვადიან ხედვაში. მითი, რომ ბიზნესის დაწყება „განსაკუთრებული ნიჭის“ ან „უდიდესი კაპიტალის“ გარეშე შეუძლებელია, მხოლოდ აფერხებს მათ, ვისაც რეალურად შეუძლია, შექმნას რამე ღირებული. განსაკუთრებით მაშინ, როცა დღეს უკვე არსებობს რესურსები, რომლებიც ამ პროცესს ბევრად ამარტივებს.