სამომხმარებლო ფასები იანვარში – რა გაძვირდა და რა გაიაფდა საქართველოში?

საქართველოს სტატისტიკის ეროვნული სამსახურის მიხედვით, 2025 წლის იანვარში ინფლაცია წინა თვესთან შედარებით 0.4% იყო, წლიურმა მაჩვენებელმა კი 2%-ს მიაღწია. თუმცა, ზოგადი მაჩვენებლების მიღმა, ცალკეული პროდუქტების ფასები სხვადასხვა მიმართულებით შეიცვალა. ამჯერად, დეტალურ ფასებს დავაკვირდებით და ვნახოთ, რა გაძვირდა და რა გაიაფდა ბოლო თვეში. ასევე, უნდა ითქვას, რომ მოკლევადიან დინამიკაზე ხშირად სეზონური ფაქტორები მოქმედებს. გრძელვადიანი ტენდენციების დასანახად კი მნიშვნელოვანია წლიური ინდექსების განხილვა.

ბოსტნეული ყველაზე მეტად გაძვირდა 1 თვის მანძილზე იანვარში. კომბოსტოს ფასი 25%-ით გაიზარდა, ბადრიჯანი 23%-ით, მწვანილი და მწვანე ლობიო 8%-ზე მეტად. ზამთრის ბოლოს ახალი მოსავლის მიწოდება მცირდება, ხოლო იმპორტირებულ პროდუქტზე მოთხოვნა იზრდება, რაც ფასზეც აისახა. ციტრუსებიდან მანდარინი თითქმის 14%-ით გაძვირდა – სეზონი დასასრულს უახლოვდება, და მაღაზიებში დარჩენილი ხილის ფასი უფრო მაღალია.
კვების პროდუქტებიდან განსაკუთრებით გამოირჩევა მზესუმზირის ზეთი, რომელიც 4%-ზე მეტად გაძვირდა. ფასმა იმატა ყავაზეც – დაფქული ყავის ფასი 4%-ზე მეტით გაიზარდა, რაც საერთაშორისო ბაზრებზე მოსავლის შემცირებას უკავშირდება.

ხორცის მოყვარულებისთვის შედარებით კარგი პერიოდია. ღორის და ქათმის ხორცი დაახლოებით 2%-ით გაიაფდა, შებოლილი ხორცის ფასი კი 5%-ით შემცირდა. ეს ტენდენცია ნორმალურია ზამთრის პერიოდში, რადგან მოთხოვნა მცირდება.
რძის პროდუქტებიდან იმერული ყველი და ხაჭო 2%-ზე მეტად გაძვირდა. ზამთარში რძის წარმოება კლებულობს, რაც ფასის ზრდას იწვევს.
ტანსაცმლის ფასები ძირითადად შემცირდა. მამაკაცის და ქალის ზამთრის ფეხსაცმელი 8%-ით გაიაფდა – სეზონის დასასრულს ფასდაკლებები უფრო აქტიურია.
თვითმფრინავის ბილეთებზე ფასები 14%-ზე მეტად შემცირდა. ზამთარი მოთხოვნის კლების პერიოდია, რის გამოც ავიაკომპანიები ბილეთებს უფრო იაფად ყიდიან. თუ გეგმავთ დასვენების დაჯავშნას ან არაპიკურ სეზონზე მოგზაურობას, ახლა შეიძლება კარგი დრო იყოს ბილეთების შეძენისთვის.
იანვრის ფასების ცვლილებები ლოგიკურია – სეზონურობამ, საერთაშორისო ტენდენციებმა და მოთხოვნა-მიწოდების დინამიკამ გარკვეული პროდუქტების გაძვირება და გაიაფება გამოიწვია. თებერვალში საინტერესო იქნება, გაგრძელდება თუ არა ეს ტენდენციები, განსაკუთრებით სასურსათო პროდუქტებში, სადაც სეზონურობა მნიშვნელოვან როლს თამაშობს.