რამდენად მიმზიდველია საქართველო „ციფრული ნომადებისთვის“?

„ციფრული ნომადები“ არიან პროფესიონალები, რომლებიც თანამედროვე ტექნოლოგიების გამოყენებით დისტანციურად მუშაობენ და ამავდროულად მოგზაურობენ. მათი სამუშაოს შესრულება შესაძლებელია მსოფლიოს ნებისმიერი წერტილიდან, სადაც არის სტაბილური ინტერნეტ-კავშირი. ეს ცხოვრების სტილი იზიდავს მათ, ვისაც სურს გაეცნოს ახალ კულტურებს, მიიღოს მრავალფეროვანი გამოცდილება და შეინარჩუნოს სამუშაოს მოქნილობა.
გლობალურად, „ციფრული ნომადებისთვის“ პოპულარული მიმართულებებია პორტუგალია, ესპანეთი, ხორვატია, ესტონეთი და კოსტა რიკა. ეს ქვეყნები სთავაზობენ სპეციალურ ვიზებს, რომლებიც დისტანციურად მომუშავეებს საშუალებას აძლევს ლეგალურად იცხოვრონ და იმუშაონ მათ ტერიტორიაზე. მაგალითად, პორტუგალიამ და ესპანეთმა შემოიღეს „ციფრული ნომადების“ ვიზები, რომლებიც არაევროკავშირის მოქალაქეებს საშუალებას აძლევს იცხოვრონ იქ, თუ ისინი დასაქმებულნი არიან უცხოურ კომპანიებში.
საქართველო ასევე ცდილობს „ციფრული ნომადების“ მოზიდვას. 2020 წელს, COVID-19 პანდემიის პერიოდში, ქვეყანამ დაიწყო დროებითი პროგრამა “Remotely from Georgia”, რომელიც 95 ქვეყნის მოქალაქეებს საშუალებას აძლევდა დისტანციურად ემუშავათ და ეცხოვრათ საქართველოში 360 დღის განმავლობაში.

„ციფრული ნომადებისთვის“ საქართველომ უკვე შექმნა გარკვეული უპირატესობები, რაც ქვეყანას მათთვის მიმზიდველს ხდის. საქართველოს აქვს ლიბერალური საიმიგრაციო პოლიტიკა: 90-ზე მეტი ქვეყნის მოქალაქეებს შეუძლიათ ქვეყანაში ვიზის გარეშე ყოფნა 365 დღის განმავლობაში. ეს მოქნილობა, დაბალ გადასახადებთან და ცხოვრების შედარებით დაბალ ხარჯებთან ერთად, „ციფრული ნომადებისთვის“ მნიშვნელოვანი ფაქტორია.

თბილისი და ბათუმი გამოირჩევიან თანამედროვე ინფრასტრუქტურით, სწრაფი ინტერნეტით და კოვორქინგ სივრცეების მრავალფეროვნებით, რაც ხელს უწყობს დისტანციურად მომუშავეებისთვის კომფორტული გარემოს შექმნას. მიუხედავად ამისა, გარკვეული გამოწვევები კვლავ არსებობს. საცხოვრებლის ფასების სწრაფი ზრდა, განსაკუთრებით თბილისში, პრობლემად იქცა. ბოლო წლებში ბინის ქირის ტარიფებმა მნიშვნელოვნად მოიმატა, რაც „ციფრული ნომადებისთვის“ ხარჯების ზრდას იწვევს. ასევე, ჯანდაცვის სერვისები, მიუხედავად მათი ხელმისაწვდომობისა, ხშირად არ აკმაყოფილებს დასავლური ქვეყნების სტანდარტებს, რაც შეიძლება დამაბრკოლებელი ფაქტორი გახდეს.
საქართველოს აქვს პოტენციალი, რომ გახდეს „ციფრული ნომადების“ ჰაბი, თუ ის გააგრძელებს ინფრასტრუქტურის გაუმჯობესებას, ხელს შეუწყობს საერთაშორისო საზოგადოებასთან ინტეგრაციას და განავითარებს შესაბამის პოლიტიკას, რომელიც „ციფრული ნომადებისთვის“ გრძელვადიან პერსპექტივაში კომფორტულ და სტაბილურ გარემოს შექმნის.